ਚੰਡੀਗੜ੍ਹ, (ਰਵਿੰਦਰ) :
87,000 ਕੁਇੰਟਲ ਤੋਂ ਵੱਧ ਸਰਕਾਰੀ ਕਣਕ ਦੀ ਲੁੱਟ ਦੇ ਹਫ਼ਤੇ ਬਾਅਦ, ਪੰਜਾਬ ਸਰਕਾਰ ਨੇ ਇਸ ਘੁਟਾਲੇ ਦੀ ਜਾਂਚ ਅੰਮ੍ਰਿਤਸਰ ਦਿਹਾਤੀ ਪੁਲਿਸ ਤੋਂ ਪੰਜਾਬ ਵਿਜੀਲੈਂਸ ਬਿਓਰੋ ਨੂੰ ਸੌਂਪ ਦਿੱਤੀ ਹੈ। ਐਸਐਸਪੀ ਵਿਜੀਲੈਂਸ, ਪਰਮਪਾਲ ਸਿੰਘ ਨੇ ਇਸ ਘਟਨਾ ਦੀ ਪੁਸ਼ਟੀ ਕਰਦਿਆਂ ਕਿਹਾ ਹੈ ਕਿ ਅੰਮ੍ਰਿਤਸਰ ਦਿਹਾਤੀ ਦੀ ਪੁਲਿਸ ਨੂੰ ਇਸ ਸਬੰਧਤ ਰਿਕਾਰਡ ਵੀਬੀ ਨੂੰ ਸੌਂਪਣ ਲਈ ਕਿਹਾ ਗਿਆ ਹੈ। ਜ਼ਿਲ੍ਹਾ ਖੁਰਾਕ ਅਤੇ ਸਿਵਲ ਸਪਲਾਈ ਕੰਟਰੋਲਰ ਰਿਸ਼ੀ ਰਾਜ ਮਹਿਰਾ ਦੀ ਸ਼ਿਕਾਇਤ ਤੋਂ ਬਾਅਦ, ਅੰਮ੍ਰਿਤਸਰ ਦਿਹਾਤੀ ਪੁਲਿਸ ਨੇ ਕਸਟੋਡੀਅਨ ਇੰਸਪੈਕਟਰ ਜਸਦੇਵ ਸਿੰਘ ‘ਤੇ ਧੋਖਾਧੜੀ (420, ਆਈਪੀਸੀ) ਅਤੇ ਅਪਰਾਧਕ ਵਿਸ਼ਵਾਸਘਾਤ (409, ਆਈਪੀਸੀ) ਅਤੇ ਆਈਪੀਸੀ ਦੀਆਂ ਹੋਰ ਸਬੰਧਤ ਧਾਰਾਵਾਂ ਦੇ ਦੋਸ਼ਾਂ ਤਹਿਤ ਮਾਮਲਾ ਦਰਜ ਕੀਤਾ ਹੈ।
6 ਅਗਸਤ ਨੂੰ ਇਸ ਸਬੰਧ ਵਿੱਚ ਕੇਸ ਦਰਜ ਹੋਣ ਤੋਂ ਕਰੀਬ ਇੱਕ ਹਫ਼ਤਾ ਪਹਿਲਾਂ ਹੀ ਜਸਦੇਵ ਸਿੰਘ ਆਪਣੇ ਘਰ ਤੋਂ ਰਹੱਸਮਈ ਢੰਗ ਨਾਲ ਲਾਪਤਾ ਹੋ ਗਿਆ ਸੀ। ਇਹ ਘਟਨਾ ਉਸ ਸਮੇਂ ਸਾਹਮਣੇ ਆਈ ਜਦੋਂ ਭਾਰਤੀ ਖੁਰਾਕ ਨਿਗਮ ਨੇ ਗਹਿਰੀ ਮੰਡੀ ਰੇਲਵੇ ਸਟੇਸ਼ਨ ਤੋਂ ਇੱਕ ਵਿਸ਼ੇਸ਼ ਰੇਲ ਗੱਡੀ ਵਿੱਚ ਕਣਕ ਨੂੰ ਚੜਾਉਣਾ ਸੀ ਅਤੇ ਨਿਯਮਾਂ ਦੇ ਅਨੁਸਾਰ, ਕਸਟੋਡੀਅਨ ਇੰਸਪੈਕਟਰ ਦਾ ਰਿਕਾਰਡ ਲਈ ਨਾਲ ਮੌਜੂਦ ਰਹਿਣਾ ਲਾਜ਼ਮੀ ਸੀ। ਹਾਲਾਂਕਿ, ਉਹ ਉੱਥੇ ਮੌਜੂਦ ਨਹੀਂ ਸੀ। ਜਦੋਂ ਅਧਿਕਾਰੀਆਂ ਨੇ ਜਸਦੇਵ ਨੂੰ ਫੋਨ ਕੀਤਾ ਤਾਂ ਉਸਦਾ ਮੋਬਾਈਲ ਬੰਦ ਸੀ। ਜਸਦੇਵ ਅਤੇ ਉਸ ਦੇ ਪਰਿਵਾਰਕ ਮੈਂਬਰ ਪਿਛਲੇ ਮਹੀਨੇ ਰਹੱਸਮਈ ਢੰਗ ਨਾਲ ਘਰ ਤੋਂ ਲਾਪਤਾ ਹੋ ਗਏ ਸਨ। ਜਸਦੇਵ ਜੰਡਿਆਲਾ, ਗਹਿਰੀ ਮੰਡੀ ਅਤੇ ਧੀਰੇ ਕੋਟ ਪਿੰਡਾਂ ਵਿੱਚ ਸਥਿਤ ਅੱਠ ਗੋਦਾਮਾਂ ਦੇ ਨਿਗਰਾਨੀ ਕਰਦਾ ਸੀ।
ਇਸ ਤੋਂ ਬਾਅਦ, ਵਿਭਾਗ ਨੇ ਆਪਣੇ ਵਿਜੀਲੈਂਸ ਟੀਮ ਦੁਆਰਾ ਖੁਦ ਜਾ ਕੇ ਜਾਂਚ ਕਰਵਾਉਣ ਦਾ ਫ਼ੈਸਲਾ ਕੀਤਾ। ਇਹ ਜਾਂਚ ਦੋ ਦਿਨਾਂ ਤੱਕ ਜਾਰੀ ਰਹੀ ਅਤੇ ਵਿਭਾਗ ਨੂੰ 20 ਕਰੋੜ ਰੁਪਏ ਦੀ 87,160 ਕੁਇੰਟਲ ਕਣਕ ਗਾਇਬ ਮਿਲੀ। ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਦੇ ਅਨੁਸਾਰ, ਡੀਐਫਐਸਸੀ ਨੇ ਕਿਹਾ ਕਿ ਪਨਗ੍ਰੇਨ ਨਾਲ ਸਬੰਧਤ 50 ਕਿਲੋ ਕਣਕ ਦੀਆਂ 1,45,787 ਬੋਰੀਆਂ ਅਤੇ 30 ਕਿਲੋ ਕਣਕ ਵਾਲੀਆਂ 47,556 ਬੋਰੀਆਂ (ਕੁੱਲ 1,93,343 ਬੋਰੀਆਂ) ਅੱਠ ਗੋਦਾਮਾਂ ਵਿੱਚੋਂ ਭਰੀਆਂ ਹੋਈਆਂ ਮਿਲੀਆਂ ਹਨ। ਪਨਗ੍ਰੇਨ ਅਤੇ ਪੰਜਾਬ ਸਰਕਾਰ ਵੱਲੋਂ ਖੁਰਾਕ ਅਤੇ ਸਿਵਲ ਸਪਲਾਈ ਵਿਭਾਗ ਨੇ ਅਨਾਜ ਮੰਡੀ ਤੋਂ ਅਨਾਜ ਖਰੀਦਿਆ ਸੀ।
ਜਾਂਚ ਤੋਂ ਬਾਅਦ ਪਤਾ ਲੱਗਾ ਕਿ ਦੋਸ਼ੀ ਨੇ ਕਣਕ ਦੇ ਘੱਟੋ-ਘੱਟ ਸਮਰਥਨ ਮੁੱਲ ਵਜੋਂ ਦਿੱਤੇ ਕਰੋੜਾਂ ਰੁਪਏ ਵੀ ਖੋਹ ਲਏ ਕਿਉਂਕਿ ਉਸਨੇ ਕਥਿਤ ਤੌਰ ‘ਤੇ 1.84 ਲੱਖ ਬੋਰੀਆਂ ਕਣਕ ਦੀ ਖ਼ਰੀਦ ਲਈ ਜਾਅਲੀ ਐਂਟਰੀਆਂ ਕੀਤੀਆਂ ਸਨ, ਜਿਸ ਨੂੰ ਜੰਡਿਆਲਾ ਗੁਰੂ ਦੇ ਗੋਦਾਮਾਂ ਵਿੱਚ ਲਿਜਾਇਆ ਗਿਆ ਸੀ। ਕਮਿਸ਼ਨ ਏਜੰਟਾਂ, ਵੇਚਣ ਵਾਲਿਆਂ, ਮੰਡੀ ਬੋਰਡ ਦੇ ਨਿਲਾਮੀ ਰਿਕਾਰਡਰਾਂ, ਏਜੰਸੀ ਇੰਸਪੈਕਟਰਾਂ ਅਤੇ ਟਰਾਂਸਪੋਰਟਰਾਂ ਦੀਆਂ ਭੂਮਿਕਾਵਾਂ ਵੀ ਜਾਂਚ ਦੇ ਘੇਰੇ ਵਿੱਚ ਸਨ। ਵਿਭਾਗ ਨੇ ਡਿਪਟੀ ਡਾਇਰੈਕਟਰ, ਜਲੰਧਰ ਡਵੀਜ਼ਨ ਸਮੇਤ 10 ਅਧਿਕਾਰੀਆਂ ਅਤੇ 2018 ਤੋਂ ਹੁਣ ਤੱਕ ਅੰਮ੍ਰਿਤਸਰ ਵਿੱਚ ਤਾਇਨਾਤ ਜ਼ਿਲ੍ਹਾ ਖੁਰਾਕ ਅਤੇ ਸਪਲਾਈ ਕੰਟਰੋਲਰਾਂ ਸਮੇਤ ਸਾਰਿਆਂ ਖ਼ਿਲਾਫ਼ ਚਾਰਜਸ਼ੀਟ ਦਾਖਲ ਕੀਤੀ ਹੈ। ਦੋ ਅਧਿਕਾਰੀਆਂ-ਸਹਾਇਕ ਖੁਰਾਕ ਅਤੇ ਸਪਲਾਈ ਅਧਿਕਾਰੀ ਚੈਰੀ ਭਾਟੀਆ ਅਤੇ ਇੰਸਪੈਕਟਰ ਰਜਿੰਦਰ ਬੈਂਸ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ।
