ਫਾਜ਼ਿਲਕਾ, ਜਨਗਾਥਾ ਟਾਇਮਜ਼, (ਸਿਮਰਨ)
ਫਾਜ਼ਿਲਕਾ : ਕੋਵਿਡ-19 ਦੇ ਮੱਦੇਨਜ਼ਰ ਜ਼ਿਲ੍ਹਾ ਫਾਜ਼ਿਲਕਾ ਵਿਖੇ ਕਰਫ਼ਿਊ ਅਤੇ ਲਾਕਡਾਊਨ ਦੀ ਸਥਿਤੀ ਕਾਰਣ ਫਸੇ ਝਾਰਖੰਡ ਦੇ 46 ਪ੍ਰਵਾਸੀਆ ਲਈ 10 ਮਈ 2020 ਨੂੰ ਬਠਿੰਡਾ ਤੋਂ ਸ਼ਾਮ 5 ਵਜ੍ਹੇ ਰੇਲਗੱਡੀ ਰਵਾਨਾ ਹੋਵੇਗੀ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਡਿਪਟੀ ਕਮਿਸ਼ਨਰ ਅਰਵਿੰਦ ਪਾਲ ਸਿੰਘ ਸੰਧੂ ਨੇ ਦੱਸਿਆ ਕਿ 10 ਮਈ ਵਾਲੇ ਦਿਨ ਫਾਜ਼ਿਲਕਾ ਦੇ 25, ਅਬੋਹਰ ਦੇ 19 ਅਤੇ ਜਲਾਲਾਬਾਦ 2 ਪ੍ਰਵਾਸੀਆਂ ਨੂੰ ਬੱਸਾਂ ਰਾਹੀ ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਸਮੇਂ ਤੋਂ ਪਹਿਲਾ ਬਠਿੰਡਾ ਰੇਲਵੇ ਸਟੇਸ਼ਨ ਤੇ ਪਹੁੰਚਾਇਆ ਜਾਵੇਗਾ, ਤਾਂ ਜੋ ਇਹ ਲੋਕ ਆਪਣੇ ਘਰਾਂ ’ਚ ਪਹੁੰਚ ਸਕਣ।
ਸ. ਸੰਧੂ ਨੇ ਦੱਸਿਆ ਕਿ ਅਬੋਹਰ ਦੇ ਸੈਲੀਬਰੇਸ਼ਨ ਪੈਲੇਸ ਤੋਂ ਕਰੀਬ ਦੁਪਹਿਰ 12 ਵਜ੍ਹੇ, ਫਾਜ਼ਿਲਕਾ ਦੇ ਛਾਬੜਾ ਪੈਲੇਸ ਤੋਂ ਲਗਭਗ 9 ਵਜ੍ਹੇ ਅਤੇ ਜਲਾਲਾਬਾਦ ਦੇ 2 ਪ੍ਰਵਾਸੀਆਂ ਨੂੰ ਫਾਜ਼ਿਲਕਾ ਲਿਆ ਕੇ ਫਾਜ਼ਿਲਕਾ ਤੋਂ ਚਲਣ ਵਾਲੀ ਬੱਸ ਰਾਹੀ ਬਠਿੰਡਾ ਰੇਲਵੇ ਸਟੇਸ਼ਨ ਲਈ ਰਵਾਨਾ ਕੀਤਾ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਇਹਨਾਂ ਪ੍ਰਵਾਸੀਆਂ ਦੀ ਬਕਾਇਦਾ ਮੁੱਢਲੀ ਜਾਂਚ ਕੀਤੀ ਜਾਵੇਗੀ ਅਤੇ ਸੰਬੰਧਿਤ ਅਧਿਕਾਰੀਆਂ ਵੱਲੋਂ ਕੋਵਾ ਐਪ ਡਾਊਨਲੋਡ ਕਰਵਾ ਕੇ ਪ੍ਰਵਾਸੀਆਂ ਨੂੰ ਰਜਿਸਟਰਡ ਕੀਤਾ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਪੰਜਾਬ ਸਰਕਾਰ ਵੱਲੋਂ ਜਾਰੀ www.covidhelp.punjab.gov.in ਵੈਬਸਾਈਟ ’ਤੇ ਇਹਨਾਂ ਵਿਅਕਤੀਆਂ ਵੱਲੋਂ ਆਪਣੀ ਰਜਿਸਟੇ੍ਰਸ਼ਨ ਕਰਵਾਈ ਗਈ ਸੀ। ਉਨ੍ਹਾਂ ਕਿਹਾ ਕਿ ਹਰੇਕ ਪ੍ਰਵਾਸੀਆਂ ਨੂੰ ਉਨ੍ਹਾਂ ਦੇ ਘਰਾਂ ਤੱਕ ਪਹੁੰਚਾਉਣ ਲਈ ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਯੋਜਨਾਬੱਧ ਢੰਗ ਨਾਲ ਕਾਰਵਾਈ ਆਰੰਭੀ ਜਾ ਰਹੀ ਹੈ।
