ਰੂਪਨਗਰ, ਜਨਗਾਥਾ ਟਾਇਮਜ਼: (ਰਵਿੰਦਰ)
ਇੰਡੀਅਨ ਇੰਸਟੀਚਿਊਟ ਆਫ ਤਕਨਾਲੌਜੀ (ਆਈ ਆਈ ਟੀ) ਰੋਪੜ, ਜੋ ਕਿ ਪੰਜਾਬ ਸੂਬੇ ਵਿਚ ਸਥਿਤ ਹੈ, ਵਲੋਂ ਆਪਣੀ ਕਿਸਮ ਦਾ ਪਹਿਲਾ ਆਈ ਓ ਟੀ (ਇੰਟਰਨੈੱਟ ਆਧਾਰਿਤ) ਯੰਤਰ “ਏਂਬੀਟੈਗ” ਈਜਾਦ ਕੀਤਾ ਗਿਆ ਹੈ। ਇਸ ਸੰਬੰਧ ਵਿੱਚ ਜਾਣਕਾਰੀ ਦਿੰਦਿਆ ਆਈ.ਆਈ.ਟੀ ਰੋਪੜ ਦੇ ਪ੍ਰਬੰਧਕਾਂ ਨੇ ਦੱਸਿਆ ਕਿ ਇਹ ਯੰਤਰ ਟੀਕਿਆਂ, ਖੂਨ ਤੇ ਸ਼ਰੀਰ ਦੇ ਅੰਗਾਂ, ਬਦਲਦੇ ਵਾਤਾਵਰਣ ਨਾਲ ਖਰਾਬ ਹੋਣ ਵਾਲੇ ਪਦਾਰਥ ( ਖਾਦ ਅਤੇ ਡੈਰੀ), ਆਦਿ ਦੀ ਢੋਆ ਢੁਆਈ ਦੇ ਦੌਰਾਨ ਮੌਜੂਦਾ ਸਮੇਂ ਦੇ ਅਨੁਸਾਰ ਵਾਤਾਵਰਣ ਦੇ ਤਾਪਮਾਨ ਨੂੰ ਰਿਕਾਰਡ ਕਰਦਾ ਹੈ। ਏਂਬੀਟੈਗ ਇੱਕ ਯੂ.ਐਸ.ਬੀ ਦੇ ਆਕਾਰ ਦਾ ਯੰਤਰ ਹੈ ਜੋ ਕਿ ਇੱਕ ਬਾਰ ਚਾਰਜ ਕਰਨ ‘ਤੇ ਪੂਰੇ 90 ਦਿਨਾਂ ਦੇ ਲਈ ਕਿਸੇ ਸਮੇਂ ਖੇਤਰ ਵਿੱਚ ਆਪਣੇ ਆਸ-ਪਾਸ ਦੇ ਤਾਪਮਾਨ ਨੂੰ -40 ਤੋਂ 80 ਡਿਗਰੀ ਤੱਕ ਲਗਾਤਾਰ ਰਿਕਾਰਡ ਕਰ ਸਕਦਾ ਹੈ। ਉਹਨਾਂ ਨੇ ਹੋਰ ਦੱਸਿਆ ਕਿ ਅੰਤਰਰਾਸ਼ਟਰੀ ਬਾਜ਼ਾਰ ਵਿੱਚ ਉਪਲਬਧ ਜ਼ਿਆਦਾਤਰ ਅਜਿਹੇ ਉਪਕਰਣ ਸਿਰਫ 30 ਤੋਂ 60 ਦਿਨਾਂ ਦੀ ਮਿਆਦ ਤੱਕ ਲਈ ਡੇਟਾ ਰਿਕਾਰਡ ਕਰਦੇ ਹਨ। ਉਹਨਾ ਕਿਹਾ ਕਿ ਅਸੀਂ ਸਰਕਟ ਵਿੱਚ ਇਲੈਕਟ੍ਰਾਨਿਕ ਸਵਿੱਚ ਪੇਸ਼ ਕਰਕੇ ਏਂਬੀਟੈਗ ਦੀ ਬੈਟਰੀ ਲਾਈਫ ਵਿੱਚ ਸੁਧਾਰ ਕਰ ਸਕਦੇ ਹਾਂ, ਜੋ ਬੈਟਰੀ ਦੀ ਵਰਤੋਂ ਨੂੰ ਆਪਣੇ ਆਪ ਵਿਵਸਥਿਤ ਕਰਦਾ ਹੈ।
ਏਂਬੀਟੈਗ ਦੇ ਅੰਦਰ ਲੌਗਿੰਗ ਅੰਤਰਾਲਾਂ, ਟਾਈਮ ਜ਼ੋਨ, ਅਤੇ ਅਲਾਰਮ ਨੂੰ ਅਨੁਕੂਲਿਤ ਕਰਨ ਲਈ ਅੰਦਰੂਨੀ ਵਿਸ਼ੇਸ਼ਤਾਵਾਂ ਦੀ ਇੱਕ ਲੜੀ ਮੌਜੂਦ ਹੈ।“ਅਵਧ” ਕੇਂਦਰ ਵਿਖੇ ਆਈਓਟੀ ਸਿਸਟਮਜ਼ ਡੋਮੇਨ ਦੇ ਕੋਆਰਡੀਨੇਟਰ ਪ੍ਰੋਫੈਸਰ ਸੁਮਨ ਕੁਮਾਰ ਨੇ ਕਿਹਾ ਕਿ ਏਂਬੀਟੈਗ ਆਈ.ਐਸ.ਓ 13485:2016, ਈ.ਐੱਨ 12830: 2018, ਸੀਈ ਅਤੇ ਆਰ.ਓ.ਐਚ.ਐਸ ਨਾਲ ਪ੍ਰਮਾਣਿਤ ਕੀਤਾ ਗਿਆ ਹੈ, ਜਿਸ ਦੀ ਕੀਮਤ ਵੱਖ-ਵੱਖ ਐਪਲੀਕੇਸ਼ਨਾਂ ਵਿੱਚ ਡਿਵਾਈਸ ਦੀ ਵਿਆਪਕ ਵਰਤੋਂ ਨੂੰ ਯਕੀਨੀ ਬਣਾਉਣ ਲਈ 1000 ਰੁਪਏ ਤੋਂ ਘੱਟ ਹੈ।
ਦੱਸਣਯੋਗ ਹੈ ਕਿ ਜਦੋਂ ਤਾਪਮਾਨ ਇੱਕ ਪੂਰਵ- ਨਿਰਧਾਰਤ ਸੀਮਾ ਤੋਂ ਜਿਆਦਾ ਹੋ ਜਾਂਦਾ ਹੈ ਤਾਂ ਇਹ ਯੰਤਰ ਇੱਕ ਚੇਤਾਵਨੀ ਪੈਦਾ ਕਰਦਾ ਹੈ। ਉਹਨਾ ਦੱਸਿਆ ਕਿ ਰਿਕਾਰਡ ਕੀਤੇ ਡੇਟਾ ਨੂੰ ਕਿਸੇ ਵੀ ਕੰਪਿਊਟਰ ਨਾਲ ਯੂ ਐਸ ਬੀ ਨੂੰ ਕਨੈਕਟ ਕਰਕੇ ਉਪਭੋਗਤਾ -ਪਰਿਭਾਸ਼ਿਤ ਫਾਰਮੈਟ ਵਿੱਚ ਪ੍ਰਾਪਤ ਕੀਤਾ ਜਾ ਸਕਦਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਏਂਬੀਟੈਗ ਤਾਪਮਾਨ ਡੇਟਾ ਲੌਗ ਉਪਭੋਗਤਾ ਨੂੰ ਸਲਾਹ ਦਿੰਦਾ ਹੈ ਕਿ ਕੀ ਆਵਾਜਾਈ ਵਾਲੀ ਵਸਤੂ ਵਰਤੋਂ ਯੋਗ ਹੈ ਜਾਂ ਆਵਾਜਾਈ ਦੌਰਾਨ ਕੋਲਡ ਚੇਨ ਨਾਲ ਸਮਝੌਤਾ ਕੀਤਾ ਗਿਆ ਹੈ। ਇਹ ਜਾਣਕਾਰੀ ਭਾਰਤ ਹਿੱਤ ਵਿੱਚ ਟੀਕਿਆਂ, ਅੰਗਾਂ ਅਤੇ ਖੂਨ ਦੀ ਢੋਆ-ਢੁਆਈ ਲਈ ਵਿਸ਼ੇਸ਼ ਤੌਰ ‘ਤੇ ਮਹੱਤਵਪੂਰਨ ਹੈ।ਉਹਨਾ ਕਿਹਾ ਕਿ ਭਾਰਤ ਵਿੱਚ ਏਂਬੀਟੈਗ ਨੂੰ ਆਈ. ਆਈ. ਟੀ ਰੋਪੜ ਟੈਕਨੋਲੋਜੀ ਇਨੋਵੇਸ਼ਨ ਕੇਂਦਰ- ਅਵਧ (ਖੇਤੀਬਾੜੀ ਅਤੇ ਜਲ ਤਕਨਾਲੋਜੀ ਵਿਕਾਸ ਕੇਂਦਰ) ਅਤੇ ਇਸ ਦੇ ਅਧੀਨ ਸਟਾਰਟਅੱਪ ਸਕਰੈਚਨੈਸਟ ਦੇ ਖੋਜਕਰਤਾਵਾਂ ਦੁਆਰਾ ਵਿਕਸਤ ਕੀਤਾ ਗਿਆ ਹੈ।
ਸਕਰੈਚਨੈਸਟ ਇੱਕ ਆਈਓਟੀ ਤਕਨਾਲੋਜੀ ਸਟਾਰਟਅਪ ਹੈ ਜਿਸ ਦੀ ਸਥਾਪਨਾ ਆਈ. ਆਈ. ਟੀ ਰੋਪੜ ਦੇ ਚਾਰ ਵਿਦਿਆਰਥੀਆਂ ਦੁਆਰਾ ਕੀਤੀ ਗਈ ਹੈ। ਉਹਨਾ ਦੱਸਿਆ ਕਿ ਏਂਬੀਟੈਗ ਵਾਟਰਪਰੂਫ ਹੈ ਅਤੇ ਟੀਕਿਆਂ ਦੀ ਢੋਆ -ਢੁਆਈ ਦੌਰਾਨ ਆਲੇ -ਦੁਆਲੇ ਦੇ ਤਾਪਮਾਨ ਦੀ ਨਿਗਰਾਨੀ ਕਰਦਾ ਹੈ, ਜਿਸ ਵਿੱਚ ਕੋਵਿਡ-19, ਦਵਾਈਆਂ, ਖੂਨ ਦੇ ਨਮੂਨੇ, ਭੋਜਨ ਅਤੇ ਡੇਅਰੀ ਉਤਪਾਦ, ਮੀਟ ਉਤਪਾਦ, ਅਤੇ ਜਾਨਵਰਾਂ ਦੇ ਵੀਰਜ ਸ਼ਾਮਲ ਹਨ।ਸਕਰੈਚਨੈਸਟ ਦੇ ਸੰਸਥਾਪਕਾਂ ਅਤੇ ਨਿਰਦੇਸ਼ਕਾਂ ਵਿੱਚੋਂ ਇੱਕ ਅਮਿਤ ਭੱਟੀ ਨੇ ਕਿਹਾ ਕਿ ਹੁਣ ਤੱਕ, ਭਾਰਤ ਦੁਆਰਾ ਅਜਿਹੇ ਉਪਕਰਣਾਂ ਨੂੰ ਹੋਰ ਦੇਸ਼ਾਂ ਜਿਵੇਂ ਕਿ; ਸਿੰਗਾਪੁਰ, ਹਾਂਗਕਾਂਗ, ਆਇਰਲੈਂਡ ਅਤੇ ਚੀਨ ਤੋਂ ਭਾਰੀ ਮਾਤਰਾ ਵਿੱਚ ਆਯਾਤ ਕੀਤਾ ਜਾ ਰਿਹਾ ਹੈ।
ਅਵਧ ਦੇ ਪ੍ਰੋਜੈਕਟ ਡਾਇਰੈਕਟਰ ਪ੍ਰੋਫੈਸਰ ਪੁਸ਼ਪੇਂਦਰ ਪੀ ਸਿੰਘ ਨੇ ਦੱਸਿਆ ਕਿ ਆਈ. ਆਈ. ਟੀ ਰੋਪੜ ਟੈਕਨੋਲੋਜੀ ਇਨੋਵੇਸ਼ਨ ਹੱਬ ਏਂਬੀਟੈਗ ਦੇ ਵੱਡੇ ਪੱਧਰ ‘ਤੇ ਉਤਪਾਦਨ ਦੀ ਤਿਆਰੀ ਕਰ ਰਿਹਾ ਹੈ। ਇਹ ਡਿਵਾਈਸ ਕੋਵਿਡ ਵੈਕਸੀਨ ਆਵਾਜਾਈ ਵਿੱਚ ਸ਼ਾਮਲ ਸਾਰੀਆਂ ਕੰਪਨੀਆਂ ਨੂੰ ਉਤਪਾਦਨ ਸਹੂਲਤਾਂ ਤੋਂ ਲੈ ਕੇ ਦੇਸ਼ ਦੇ ਆਖਰੀ ਮੀਲ ਟੀਕਾਕਰਨ ਕੇਂਦਰਾਂ ਤੱਕ 400 ਰੁਪਏ ਦੀ ਉਤਪਾਦਨ ਲਾਗਤ ਨਾਲ ਉਪਲਬਧ ਕਰਵਾਇਆ ਜਾਵੇਗਾ। ਪ੍ਰੋਫੈਸਰ ਸਿੰਘ ਨੇ ਕਿਹਾ ਕਿ ਇਹ ਯੰਤਰ ਦੇਸ਼ ਵਿੱਚ ਪਹਿਲਾ ਕਦੇ ਨਾ ਵੇਖੀ ਜਾਣ ਵਾਲੀ ਮਹਾਂਮਾਰੀ ਤੋਂ ਬਾਹਰ ਆਉਣ ਅਤੇ ਆਤਮ ਨਿਰਭਰ ਭਾਰਤ ਨੂੰ ਉਤਸ਼ਾਹਿਤ ਕਰਨ ਲਈ ਸਾਡਾ ਛੋਟਾ ਜਿਹਾ ਯੋਗਦਾਨ ਹੈ।
